[Tamil/தமிழ்] வாடகைக்காரருக்கான எரிசக்தி மற்றும் நீர் சேமிப்புக்கான வழிகாட்டி

எரிசக்தி மற்றும் நீர் சேமிப்பு நடவடிக்கைகளின் மூலம் பயனடைவதற்கு நீங்கள் ஒரு வீட்டு உரிமையாளராக இருக்க வேண்டிய அவசியமில்லை. ஆஸ்திரேலியர்களில் ஏறத்தாழ மூன்றில் ஒரு பகுதியினர் வாடகை வீடுகளில் வசிக்கின்றனர். உங்கள் வாடகை வீட்டில் நீங்கள் மாற்றக்கூடிய விஷயங்களுக்கு வரம்புகள் இருந்தாலும், சூரிய மின் தகடுகள் மற்றும் மழைநீர்த் தொட்டிகள் ஒரு தெரிவாக இல்லாத பட்சத்தில் கூட, உங்கள் கட்டணங்களையும் சுற்றுச்சூழல் பாதிப்பையும் குறைக்க வழிகள் உள்ளன. உண்மையில், எரிசக்தியையும் நீரையும் சேமிக்க நீங்கள் எடுக்கக்கூடிய மிகவும் பயனுள்ள சில நடவடிக்கைகள், உங்களுக்கு எந்தவிதமான நிதிச் செலவும் அறவே இல்லாமல் உங்கள் அன்றாடப் பழக்கவழக்கங்களில் சிறிய மாற்றங்களைச் செய்வதில் கவனம் செலுத்துகின்றன.

நீங்கள் குறுகிய காலத்திற்கோ அல்லது நீண்ட காலத்திற்கோ வாடகைக்கு இருந்தாலும், உங்கள் வசதியையோ அல்லது வாழ்க்கை முறையையோ தியாகம் செய்யாமல், எரிசக்தி மற்றும் நீர் பயன்பாட்டைக் குறைத்து, ஆண்டு முழுவதும் நூற்றுக்கணக்கான டாலர்களைச் சேமிக்க நீங்கள் செய்யக்கூடிய பல எளிய, மலிவான காரியங்கள் உள்ளன.

எரிசக்தி சேமிப்பு யோசனைகள்

எரிசக்திச் செயல்திறன் (சில நேரங்களில் செயல்திறன் கொண்ட எரிசக்திப் பயன்பாடு என்றும் அழைக்கப்படுகிறது) என்பது அதே அளவிலான செயல்திறன், வசதி மற்றும் சௌகரியத்தை வழங்க குறைந்த எரிசக்தியைப் பயன்படுத்துவதாகும். வீட்டு எரிசக்திப் பயன்பாட்டையும் கட்டணங்களையும் குறைக்க இந்த நடைமுறை நடவடிக்கைகளை எடுக்க முயற்சிக்கவும்.

• எரிசக்திச் செயல்திறன் கொண்ட உபகரணங்களைத் தேர்ந்தெடுக்கவும். உங்கள் வீட்டு எரிசக்திப் பயன்பாட்டில் 30 விழுக்காடு வரை வீட்டு உபகரணங்களே காரணமாகின்றன. எனவே, நீங்கள் தேர்ந்தெடுக்கும் உபகரணங்களின் வகையும், அவற்றை நீங்கள் பயன்படுத்தும் விதமும் உங்கள் எரிசக்தி நுகர்வு மற்றும் கட்டணங்களில் பெரும் வித்தியாசத்தை ஏற்படுத்துகின்றன. நீங்கள் ஒரு புதிய உபகரணத்தை வாங்கும்போது, ​​எரிசக்திச் செயல்திறன்மிக்க ஒரு வடிவமைப்பில் வாங்குவதைக் கருத்தில் கொள்ளுங்கள். அது எவ்வளவு எரிசக்திச் செயல்திறன் வாய்ந்தது என்பதைத் தீர்மானிக்க, எரிசக்தி மதிப்பீட்டுக் குறியீட்டைப் (Energy Rating Label) பாருங்கள்—அதிக நட்சத்திரங்கள் இருந்தால், நீங்கள் அதிக எரிசக்தியையும் பணத்தையும் சேமிக்க முடியும்.
• உங்கள் தட்பவெப்பநிலையைக் கட்டுப்படுத்துதல். வீட்டு எரிசக்திப் பயன்பாட்டில் சுமார் 40 விழுக்காடு வெப்பமூட்டுவதற்கும் குளிரூட்டுவதற்கும் செலவாகிறது. குளிர்காலத்தில், உங்கள் வெப்பமூட்டும் மாற்றிகளை (thermostats) 18–20 பாகை (டிகிரி) செல்சியஸில் அமைத்துக் கொள்வதைக் கருத்தில் கொள்ளுங்கள். கோடைக்காலத்தில், உங்கள் குளிரூட்டும் மாற்றிகளை (thermostats) 25–27 பாகை (டிகிரி) செல்சியஸில் அமைத்துக் கொள்ள முயற்சிக்கவும். வெப்பமாற்றியை (thermostat) ஒரு பாகை (டிகிரி) அதிகமாக (அல்லது குறைவாக) அமைப்பது கூட, உங்கள் வீட்டை வெப்பப்படுத்த மற்றும் குளிரூட்டப் பயன்படுத்தப்படும் எரிசக்தியை 5 முதல் 10 விழுக்காடு வரை குறைக்க முடியும். நீங்கள் குளிர்சாதனப்பெட்டி அல்லது வெப்பமூட்டி (heater) போன்றவற்றை இயக்கும்போது, ​​நீங்கள் பயன்படுத்தாத அறைகளின் உள் கதவுகளை மூடி, அந்த அறைகளைப் பூட்டிவிடுங்கள்.
• இடைவெளிகளையும் விரிசல்களையும் அடைத்தல். உங்கள் வீட்டைக் காற்றுப் புகாதவாறு அமைத்து, இடைவெளிகள் மற்றும் விரிசல்கள் வழியாக சூடான மற்றும் குளிர்ந்த காற்று வெளியேறுவதைத் தடுப்பதன் மூலம், உங்கள் எரிசக்திக் கட்டணத்தை 25 விழுக்காடு வரை நீங்கள் குறைக்கலாம். கதவுகளுக்கு அடியில் காற்று வெளியேறுவதைத் தடுக்க, மணல் நிரப்பப்பட்ட துணியால் ஆன காற்றுத் தடுப்பானை (நீண்ட 'பாம்பு' போன்ற தோற்றமுடையது) பயன்படுத்தவும். மேலும், சன்னல்கள், தரைப்பலகைகள், சுவரோரப் பலகைகள் (skirting boards), மேற்கூரை சன்னல்கள் (skylights) மற்றும் மேற்கூரை விளிம்புகளுக்கு (cornices) காலநிலைத் தடுப்புப் பட்டைகளைப் பயன்படுத்தவும். எந்தவொரு காலநிழலத் தடுப்புகளைப் பொருத்துவதற்கு முன்னர் உங்கள் வீட்டு உரிமையாளரிடம் கேட்டுச் சரிபார்த்துக் கொள்ளவும்.
• சன்னல்களின் செயல்திறனை மேம்படுத்துதல். சன்னலுக்கு அருகில் அசைவற்ற காற்றின் ஓர் அடுக்கைத் தக்கவைத்துக் கொள்ளும் வகையில், திரைச்சீலைகள் (curtains) மற்றும் திரைமறைப்புகளை (blinds) இறுக்கமாகப் பொருத்துவதன் மூலம் வெப்ப இழப்பைத் தடுக்கவும். குளிர்காலத்தில் பகல் நேரத்தில் சூரிய ஒளி உள்ளே வருவதற்காகத் திரைச்சீலைகளைத் திறந்து வைத்து, இருட்டுவதற்கு முன் அவற்றை நீங்கள் மூடியும் விடலாம். அதேபோல், கோடை காலத்தில் பகலின் வெப்பமான நேரத்தில் திரைச்சீலைகளை மூடுவது ஒரு நல்ல யோசனையாகும்.
• குளிரூட்டியை (air-conditioner) விட மின்விசிறியைத் தேர்ந்தெடுத்தல். கூரை மின்விசிறிகள் (ceiling fans) மற்றும் மேடை மின்விசிறிகள் (pedestal fans) ஒரு மணி நேர இயக்கத்திற்கு சுமார் ஒரு 'சென்ட்' (cent) செலவாகிறது, மேலும் குளிரூட்டிகளை விட மிகக் குறைவான பசுமை இல்ல வாயுக்களையே வெளியிடுகின்றன. விசிறிகள் காற்றைச் சுழற்சி செய்ய உதவுகின்றன, மேலும் அவை குளிர்சாதன அமைப்புகளின் செயல்திறனை மேம்படுத்தவும், சூடான காற்றைச் சுழற்சி செய்யவும், குளிர்காலத்தில் உங்கள் வெப்பமூட்டும் திறனை மேம்படுத்தவும் பயன்படுத்தப்படலாம்.
• எரிசக்திச் செயல்திறன்மிக்க விளக்குகளுக்கு மாறுதல். வீட்டு எரிசக்திப் பயன்பாட்டில் சுமார் 7 விழுக்காடு விளக்குகளுக்காகச் செலவிடப்படுகிறது. எரிசக்திச் செயல்திறன்மிக்க விளக்குகளுக்கு மாறுவதன் மூலமும், விளக்குகளைத் திறமையாகப் பயன்படுத்துவதன் மூலமும் உங்கள் விளக்குச் செலவுகளைப் பாதியாகக் குறைக்கலாம். பழைய வகை வெண்சுடர் மின்விளக்குகளுக்குப் (incandescent globes) பதிலாக சிறிய பாதரச ஆவி விளக்குகள் (compact fluorescent lamps - CFLs) அல்லது ஒளி உமிழும் இருமுனையங்களைப் (light emitting diodes - LEDs) பயன்படுத்துவது எரிசக்திச் செலவுகளைச் சேமிப்பதற்கான ஒரு சிறந்த வழியாகும். CFL-கள் ஒரு வெண்சுடர் ஒளிவிளக்கின் (incandescent light globe) எரிசக்தியில் ஏறத்தாழ 20 விழுக்காட்டையே பயன்படுத்துகின்றன, மேலும் 4 முதல் 10 மடங்கு வரை நீண்ட காலம் நீடிக்கின்றன.
• காத்திருப்பு ஆற்றல் (Standby power). தொலைபேசி மின்னேற்றிகள் (phone chargers), விளையாட்டு முனையங்கள் (game consoles), நுண்ணலை மின் அடுப்புகள் (microwave ovens) மற்றும் பேரொலிக் கருவிகள் (stereos) போன்ற பல உபகரணங்களும் மின்கருவிகளும் பயன்பாட்டில் இல்லாதபோதும் தொடர்ந்து மின்சாரத்தை எடுத்துக்கொள்கின்றன. இந்த காத்திருப்பு மின்சாரம் உங்கள் வீட்டு மின்சாரப் பயன்பாட்டில் 10 விழுக்காட்டைக் கொண்டிருக்கலாம். நீங்கள் உபகரணங்களையும் மின்கருவிகளையும் பயன்படுத்தி முடித்தவுடன், சுவரில் உள்ள மின் இணைப்பை அணைப்பதன் மூலம் உங்கள் எரிசக்திப் பயன்பாட்டையும் கட்டணங்களையும் குறைக்கலாம். அதில் ஒரு சிறிய காத்திருப்பு விளக்கோ அல்லது கடிகாரமோ இருந்தால் - அதுவும் மின்சாரத்தைப் பயன்படுத்துகிறது.
• குளிர்சாதனப் பெட்டிகள் (fridges) மற்றும் உறைவிப்பான்கள் (freezers). உங்கள் குளிர்சாதனப் பெட்டிக்கான உகந்த வெப்பநிலை 3 முதல் 5 பாகை (டிகிரி) செல்சியஸ் வரையாகும்; அல்லது உங்கள் உறைவிப்பானுக்கு -15 முதல் -18 பாகை (டிகிரி) செல்சியஸ் வரையாகும். ஒவ்வொரு பாகை (டிகிரி) குறைவுக்கும் 5 விழுக்காடு அதிக எரிசக்தி தேவைப்படும். உறைவிப்பானில் படிந்துள்ள பனியை அகற்றுவதன் மூலமும், காற்றோட்டத்திற்காக அவற்றைச் சுற்றி 5-8 சென்டிமீட்டர் இடைவெளி விடுவதன் மூலமும் உங்கள் குளிர்சாதனப் பெட்டி மற்றும் உறைவிப்பானின் செயல்திறனை மேம்படுத்துங்கள். கேளிக்கைக்காக உங்களிடம் இரண்டாவது குளிர்சாதனப் பெட்டி இருந்தால், உங்களுக்குத் தேவைப்படும்போது மட்டும் அதை இயக்கவும்.
• துணிகளைத் துவைத்தல் மற்றும் உலர்த்துதல். இயந்திரத்தில் துவைக்கும்போது, ​​குளிர்ந்த நீரைப் பயன்படுத்துவதன் மூலமும், முடிந்தவரை குறுகிய சுழற்சியைத் தேர்ந்தெடுப்பதன் மூலமும், துணிகளின் மொத்த கனஅளவிற்கு ஏற்ப நீரின் அளவைச் சரிசெய்வதன் மூலமும், முழுமையாக நிரப்புவதற்குப் போதுமான துணிகள் சேரும் வரை காத்திருப்பதன் மூலமும் நீங்கள் எரிசக்தியையும் நீரையும் சேமியுங்கள். துணிகளை மின்சாரத் துணி உலர்த்தியில் (electric clothes dryer) உலர்த்துவதற்குப் பதிலாக, துணி காயப்போடும் கயிற்றில் உலர்த்துங்கள்—அதற்குச் செலவு இல்லை.

நீர் சேமிப்பு உதவிக் குறிப்புகள்

நீரைச் சிக்கனமாகப் பயன்படுத்துவது, ஒவ்வொரு துளி நீரையும் ஒவ்வொரு டாலரையும் பயனுள்ளதாக்க உதவுகிறது. நமது எதிர்காலத்திற்காக நீரைப் பாதுகாக்க, வீட்டிலும் தோட்டத்திலும் நீரை விவேகமாகப் பயன்படுத்தப் பல நடவடிக்கைகள் உள்ளன.

• நீர் சிக்கனமுள்ள உபகரணங்கள் மற்றும் பொருத்திகளைக் (fixtures) கருத்தில் கொள்ளுங்கள். ஒரு புதிய உபகரணம் அல்லது பொருத்தியை (fixture) வாங்கும்போது, ​​நீர் சிக்கனமுள்ள வடிவமைப்பைக் கருத்தில் கொள்ளுங்கள். நீர் சிக்கனக் குறியீடு மற்றும் தரநிலைகள் (WELS) மதிப்பீட்டைத் தேர்ந்தெடுங்கள்.
• தண்ணீர்க் குழாய்களைத் திறமையாகப் பயன்படுத்துதல். ஒரு வினாடிக்கு ஒரு சொட்டு என்ற விகிதத்தில் கசியும் ஒரு தண்ணீர்க் குழாய், ஓர் ஆண்டுக்கு 12,000 லிட்டருக்கும் அதிகமான நீரை வீணாக்குகிறது. கசியும் தண்ணீர்க் குழாய்களைக் கூடிய விரைவில் சரிசெய்வதன் மூலம் நீரைச் சேமியுங்கள். காற்றூட்டிகளை (aerators) நிறுவுவதன் மூலம் உங்கள் நீர்ப் பயன்பாட்டைக் குறைக்கலாம். காற்றூட்டிகள் நீரின் ஓட்டத்தைக் கட்டுப்படுத்துகின்றன, மேலும் அவற்றை குழாய்களின் உள்ளேயோ அல்லது வெளியேயோ பொருத்தலாம். அதைச் செய்வதற்கு முன் உங்கள் வீட்டு உரிமையாளரிடம் நீங்கள் கேட்டுச் சரிபார்க்க வேண்டியிருக்கலாம்.
• நீர் சிக்கனமுள்ள நீர்த்தாரைக் குளியல் சாதனத்தைப் (showerhead) பொருத்துதல். உங்களிடம் பழைய, திறனற்ற நீர்த்தாரைக் குளியல் சாதனங்கள் (showerheads) இருந்தால், அவற்றை நீர் சிக்கன மாடல்களாக மாற்றுமாறு உங்கள் வீட்டு உரிமையாளரிடம் கேட்டுப் பாருங்கள். ஏனென்றால், இவை ஏறத்தாழ மூன்றில் ஒரு பங்கு தண்ணீரையே பயன்படுத்துவதோடு, எரிசக்தி மற்றும் தண்ணீர்க் கட்டணங்களில் ஆண்டுக்கு 200 டாலர்களுக்கும் மேல் சேமிக்க உதவும்.
• விசைநீர் கழிப்பறைகள் (Flushing toilets). இரட்டை விசைநீர் (dual-flush) கழிப்பறையைப் பயன்படுத்தும்போது, ​​பொருத்தமான இடங்களில் பாதி விசைநீர் (half-flush) முறையைத் தேர்ந்தெடுக்கவும். உங்கள் வீட்டு உரிமையாளர் ஒற்றை விசைநீர் (single-flush) கழிப்பறையை மாற்றினால், நீங்கள் நீர் சிக்கன இரட்டை விசைநீர் (dual-flush) வடிவமைப்பைப் பரிந்துரைக்கலாம். ஏனெனில், இது நபர் ஒருவருக்குத் தினமும் 51 லிட்டர் தண்ணீரைச் சேமிக்க உதவும். இது சாத்தியமில்லை என்றால், நீங்கள் ஒரு நீர் இடப்பெயர்ச்சி சாதனத்தை (water displacement device) வாங்கலாம் அல்லது நீர்த்தேக்கத் தொட்டியில் (cistern) தண்ணீர் நிரப்பப்பட்ட ஒரு பிளாஸ்டிக் பாட்டிலைப் பயன்படுத்தி அதன் நீர் கொள்ளளவைக் குறைக்கலாம்.
• தோட்டத்திற்கான நீர் பயன்பாட்டைக் குறைக்கவும். ஒரு பாரம்பரிய பசுமையான புல்வெளி, உங்கள் தோட்டத்திற்கான தண்ணீரில் 90 விழுக்காடு வரை பயன்படுத்தக்கூடும். உங்கள் புல்வெட்டும் இயந்திரத்தை 4 சென்டிமீட்டர் அல்லது அதற்கும் அதிகமான உயரத்தில் வெட்டும்படி மாற்றி அமைப்பதன் மூலம் இதை நீங்கள் குறைக்கலாம். மேலும், தண்ணீர் பாய்ச்சும் முறைகளை மேம்படுத்துவதன் மூலமும், நீர் சிக்கனத் தயாரிப்புகளைத் தேர்ந்தெடுப்பதன் மூலமும் உங்கள் தோட்டத்திற்கான நீர் பயன்பாட்டைக் குறைக்கலாம்.

வாடகைதாரருக்கான ஆதாரவளங்கள்

உங்கள் வீட்டு உரிமையாளர் அல்லது 'எஸ்டேட்' முகவரிடம் பேசுதல்

நீடித்த மேம்பாடுகள் உள்ளிட்ட பழுதுபார்த்தல், சேவை செய்தல் அல்லது பராமரித்தல் போன்றவற்றுக்குப் பொதுவாக உங்கள் வீட்டு உரிமையாளரிடமிருந்து அனுமதி (மற்றும் நிதி) தேவைப்படும். ஒவ்வொரு மாநிலம் மற்றும் பிரதேசத்திலும் வாடகைதாரர்களுக்கான சட்டங்கள் வேறுபடுகின்றன, எனவே வீட்டில் எந்தவொரு மாற்றங்களையும் செய்வதற்கு முன், நீங்கள் நன்கு ஆராய்ந்து அதன்பின் அனுமதி கேட்பது முக்கியமாகும்.

நீடித்த மேம்பாடுகளைக் கோரி உங்கள் வீட்டு உரிமையாளர் அல்லது 'எஸ்டேட்' முகவரை அணுகும்போது மனதில் கொள்ள வேண்டிய சில காரியங்களில் பின்வருவன அடங்கும்:  

• சலுகைகள் மற்றும் உதவி. நீடித்த மேம்பாடுகளைச் செய்வதற்காக வீட்டு உரிமையாளர்களுக்குப் பல்வேறு அரசாங்கச் சலுகைகளும் உதவிகளும் கிடைக்கின்றன. உங்கள் கோரிக்கைக்கு உதவ, உங்கள் வீட்டு உரிமையாளருக்காக நீங்கள் சில ஆராய்ச்சிகளைச் செய்யலாம், மேலும் உங்கள் சூழ்நிலைக்குப் பொருத்தமானதைக் கண்டறிய எங்கள் சலுகைகள் மற்றும் உதவிப் பகுதியைப் பார்க்கலாம்.
• வரி விலக்குகள். பல வீட்டு மேம்பாடுகள், அத்துடன் பழுதுபார்ப்புகள் மற்றும் பராமரிப்பு ஆகியவை வரி விலக்குக்கு உட்பட்டவை. உங்கள் வீட்டிற்கு எந்தெந்த அம்சங்கள் பொருந்தும் என்பதைப் பார்க்க, ஆஸ்திரேலிய வரி அலுவலகத்தின் 'வாடகைச் சொத்து உரிமையாளர்களுக்கான வழிகாட்டி'யைப் பார்த்து, ஏதேனும் நல்ல செய்திகளை உங்கள் வீட்டு உரிமையாளருக்குத் தெரிவிக்கலாம்.
• முதலீட்டுப் பலன்கள். வீட்டு எரிசக்தி மற்றும் நீர் சிக்கனத்திற்கு வழிவகுக்கும் வீட்டு மேம்பாடுகளில் முதலீடு செய்வதன் மூலம், உங்கள் வீட்டு உரிமையாளர் சொத்தின் மதிப்பை அதிகரிக்க முடியும், இது எதிர்காலத்தில் வாங்குபவர்களுக்கும், வாடகைதாரர்களுக்கும் மேலும் கவர்ச்சிகரமானதாக அதை மாற்றும்.

உங்கள் வீட்டு உரிமையாளர் அல்லது 'ரியல் எஸ்டேட்' முகவரிடம் நீங்கள் முன்வைக்கும் கோரிக்கைகள் யாவும் எழுத்துப்பூர்வமாக இருப்பதை உறுதிப்படுத்திக் கொள்ளுங்கள். மேலும், அனைத்து கோரிக்கைகளையும், அத்துடன் மாற்றங்கள் அல்லது மேம்பாடுகளைச் செய்வதற்கான உங்கள் வீட்டு உரிமையாளர் அல்லது 'ரியல் எஸ்டேட்' முகவரின் ஒப்பந்தங்களையும் பதிவு செய்து வைப்பது ஒரு நல்ல யோசனையாகும்.

தெரிந்துகொள்ளவும் மேலும் அதிகமாகச் சேமிக்கவும் விரும்புகிறீர்களா?

எரிசக்தி, கழிவு, நீர் மற்றும் பயணச் செயல்திறன் குறித்த ஏராளமான நடைமுறை ஆலோசனைகளும், அரசாங்க உதவி பற்றிய தகவல்களும் ஆங்கிலத்தில் www.energy.gov.au என்ற இணையதளத்தில் கிடைக்கின்றன.

பொறுப்புத் துறப்பு

மொழிபெயர்ப்பு செய்யப்பட்ட ஆவணத்தின் நம்பகத்தன்மைக்கு காமன்வெல்த் உத்தரவாதம் அளிக்கவில்லை, மேலும் அசல் ஆவணம் அல்லது இந்த மொழிபெயர்ப்பில் உள்ள எந்தவொரு தகவலின் துல்லியத்தன்மை அல்லது துல்லியமின்மை குறித்தும் எந்தக் கருத்தையும் தெரிவிக்கவில்லை. மொழிபெயர்ப்பின் துல்லியம் உட்பட இந்த மொழிபெயர்ப்பு தொடர்பாக காமன்வெல்த் எந்த உத்தரவாதமும் அளிக்கவில்லை இந்த மொழிபெயர்ப்பை யாரேனும் பயன்படுத்துவதாலோ அல்லது நம்புவதாலோ நேரடியாகவோ அல்லது மறைமுகமாகவோ ஏற்படும் எந்தவொரு சேதம், காயம் காரணமாக ஏற்படும் இழப்புக்கும் காமன்வெல்த் மற்றும் அதன் அதிகாரிகள், ஊழியர்கள் அல்லது முகவர்கள் பொறுப்பேற்க மாட்டார்கள்; அத்தகைய பயன்பாடு அல்லது நம்பிக்கை, முகமையால் வழங்கப்பட்ட தகவல் அல்லது ஆலோசனையின் அடிப்படையில் அமைந்திருந்தாலும் அல்லது இல்லாவிட்டாலும் பொறுப்பல்ல.